Баҳриддин Талапов –т.ф.н., НамДУ Миллий ғоя, маънавият асослари ва ҳуқуқ таълими кафедраси мудири
Жамиятни янгилашнинг асосий шарти ижтимоий-маънавий ҳаётни, кишилар онги ва тафаккурини эркин яшашга халақит берадиган догмалардан халос қилишдир. Минг афсуски, ушбу субъектив ҳодисалар тез ва осон ўзгарадиган нарсалар эмас, уларни англанган ҳолда, изчил амалга ошириладиган туб ислоҳотлар янгилаши мумкин. Юртбошимиз мустақилликка эришган илк кунларидаёқ ижтимоий-маънавий ислоҳотларсиз кишиларни янги демократик жамият қуришга сафарбар этиб бўлмаслигини англади, шунинг учун у ҳар бир асари ва чиқишида маънавий ҳаётни янгилаш демократик тараққиётнинг шарти эканлигини таъкидлайди.
“Маънавият”, “маънавий тараққиёт”, “маънавий дунё” каби тушунчалар ва сўзлар бугун илмий адабиётларда кўп ишлатилмоқда. Уларнинг фалсафий, социологик, аксеологик, тарихий, педагогик, этнологик, психологик жиҳатлари хусусида кўплаб асарлар, мақолалар, тўпламлар чоп этилмоқда
[1]. Биз уларнинг этимологик мазмуни, талқини, генезиси ҳақида баҳс-мунозараларни давом эттирмоқчи эмасмиз, чунки у тадқиқотимиз мақсади ва вазифаларига кирмайди. Шунинг учун биз ижтимоий-маънавий ислоҳотлар ва уларнинг демократик тафаккурнинг шаклланишига ва демократик қадриятларнинг ҳаёт тарзига айланиши жараёнларига ўз диққатимизни қаратамиз. И.А.Каримовнинг миллий демократик тараққиёт концепцияси ижтимоий-маънавий ислоҳотларни жамиятда амалга оширилаётган туб ўзгаришларнинг ҳам таркибий қисми, ҳам пировард натижаси сифатида қарашга ундайди.